Bikubesong har eit herleg galleri av heilt vanlege, uvanlege typar. Stykket gjev innblikk i liva til menneske som bur i ein murbolig i Odda, men historia kunne like gjerne ha funne stad ein annan plass i Norge.

Bikubesong er basert på Frode Grytten sin suksessroman, som vart selt i 70 000 eksemplar. Då boka kom ut, vart ho raskt ein publikumsvinnar. Grytten henta heim ein Bragepris og vart nominert til Nordisk Råd sin Litteraturpris. Romanen er sett saman av 25 historier om dette fargesterke typegalleriet. Regissør Lasse Kolsrud har laga ei forteljing for scena og krydra ho med musikk. I tillegg til ein hund og 15 personar i ensemblet, spelar òg låtane til The Smiths ei sentral rolle i framsyninga, framført av eit liveband på scenen.